Monday, July 16, 2018

රැය පුරා...

අකීකරු මතක සිත්තම්
නන්වන හසුන් බොත්තම්
කරන් මම වත්තම්
එන්නද සිහිනයට යන්තම්

ඇවිළි හිත් මත්තේ වැටී
මූදාලූ සැනසුම් කැටී
ඇසෙනවද තාමත් ගැටී
මෙවුල් දම ලෙළදුන් හැටී

පිපුණ මල්පෙති හිත පුරා
නිවූ රැස් සිටි ගත අරා
තුරුල් වෙනු බැරි රැය මරා
ගමු ටිකක් මතකෙන් සොරා

සිංදවා සීමා හිතේ
අපි අපිට හිමිකර ගතේ
සැණකෙලිය විඳි හිතුමතේ
සිහිනයද තෙත්කොට ඇතේ

Wednesday, May 9, 2018

මිනිසුන්

සමනොළ තටු මත කටු ඇන හිනහෙති
කඳුලු වලට හුරු නැති මිනිසුන්
පිණි කැට මැද මැවු පැහැ දැක වැලපෙති
කලු සුදු ලොව ඉපදුන මිනිසුන්

තත්පර දිවියක පැය කටු සොයමින්
සිහින පොදි බඳී නොමියෙන මනසින්
පැතුම් යදම් වට සිරකර සරසති
හැරයන දා යන නිරුවත මිනිසුන්

බිඳී වෙන්ව සිරගත කල සිතිවිලි
ගැටේ නිතර පැරදුම මග හරිමින්
තනුවෙන් හැඩ කර රවටති රැවටෙති
එලිසම නැති ජීවිත මිනිසුන්